Rang Parik Putuih kalapau randah,
Mambao balam dalam sarangnyo.
Kasieh putuih sayang tak sudah,
Lauik nan dalam nan di hadangnyo

Duo tigo toko di Padang
Sabuah sajo toko basi.
Duo tigo bungo nan kambang,
Sabuah sajo nan di hati

Rami urang ditangah balai,
Rami dek anak urang Tiku.
Bia kini kito bacarai,
Asalkan nanti kito batamu

Kain batiek tabang mangirok.
Unduang-unduang anak rang Bayang.
Tampak adiek darah tasirok,
Badan bak raso bayang-bayang

Bia badarai padi sipuluik,
Jiko badarai mangko dikaka.
Bia bacarai kito dimuluik,
Asa dihati indak batuka

Anak urang Koto nan Ampek
Cabiek – cabiek tapi kainnyo.
Nan hilang indak kadapek,
Cari nan lain kagantinyo

Rami yo rami rang Pasa Talu,
Rami dek anak si urang Kajai.
Dimalah hati indak karindu,
Sadang basayang badan bacarai

Sumua batembok didalam tangsi,
Karieng ditimbo urang kawalan.
Sungguah karamuak didalam hati,
Namun dimuko tak di-liekkan

Anak urang Tanjuang Andaleh,
pai kabalai hari sanjo.
Bia habih bialah tandeh,
Hati den kanai kabaa juo

Kasuok jalan ka Supinang,
Kakida jalan ka Muaro.
jo Suok jawek kasieh sayang
Jo kida apuih aie mato

Kok tak dapek musim manyiang,
Musim manuai den nanti juo.
Kok tak dapek samaso bujang,
Baranak ampek den nanti juo