Karatau madang di hulu
Babuah babungo balun
Marantau bujang daulu
Dirumah baguno balun

Tinggi malanjuiklah oi batang
Kijang barandam maelo tali
Tingga lanjuiklah oi kampuang
Bujang bajalan hanyo lai

Talang dipancuang ditugakan
Batang nan kaciak dipatipih
Sayang dikampuang ditinggakan
Sayang kaadiak dipatangih

Tangsi curup muaro aman
limpapeh hinggok dilantai
Bundo kanduang tagiahkan iman
Malapeh anak bujang marasai

Bukik putuih rimbo kaluang
Dirandang jaguang ditarehkan padi
Tikaik putuih nak batulang
Dipandang gunuang dikarehkan hati

Karatau disangko madang
Saenggan panangguang padi
Marantau disangko sanang
Maninggakan kampuang barisau hati
Mancarikan paruik tak baris
Mancarikan pungguang tak basaok
Mancarikan kapalo tak batutuik

Disangko murah batimbakau
mancik maampai pulo
Disangko mudah pai marantau
Basakik sakik marasai pulo

Dek ameh sagalo kameh
Dek padi mangko manjadi
Hiduik dirantau taraso lameh
Dek marasai satiok hari

Kok jadi pai ka pakan
Ikan bali balanak bali
Ikan panjang bali daulu
Kok jadi pai bajalan
Sanak cari dunsanak cari
Induak samang cari daulu

Kalo pandai bakain panjang
Labiah pado bakain saruang
Kok pandai bainduak samang
Labiah pado bainduak kanduang

Laguah lagah bunyi padati
Jan sampai titian patah
Elok elok dirantau urang
Jan sampai bauek salah

Babelok belok pantau baranang
Bajipang batang mangkudu
Elok elok dirantau urang
Jan pulang mambuek malu

Habih miang dek bagisie
Habih malu dek biaso

Rao rao sasudah panti
Painan jo taluak kabuang
Dimano bumi dipijak
disinan pulo langik dijunjuang

Barakik baranang kompang
Batu hampa ambiak ka panto
Basakik dulu mangko ka sanang
Baitu pituah niniak kito
Marunduak lalu ka pakan
Manyiluduak sambia balari
Tatumbuak biduak dikelokkan
Tatumbuak kato dipikiri

Kalek buah marapalam
Ambiak mako dimakan
Sasek diujuang jalan
Baliak ka pangka jalan

Laka jo dulang dalam lubuak
Sasah tali barendo bukan
Aka hilang paham tatumbuak
Basarah diri pado Tuhan

Badamtam badie rang mudiak
Timbalan badie rang jao
Bialah bansaik asa cadiak
Talawan dunia urang kayo

Singkarak kotonyo tinggi
Sumaniak mandadok dulang
Awan bararak ditangisi
Badan jauah dirantau urang

Baduri duri batang manau
Salaronyo babuangan juo
Satinggi tinggi tabang bangau
Inggoknyo kakubangan juo

Hujan ameh dinagari urang
Hujan batu dinagari awak
Taraso sanang dirantau urang
Kampuang jauah salalu nampak

Kok anak pai marantau
Kok mandi dibawah bawah
Kok manimbo di hilie hilie
Tapi kok dialiah urang lantak pasupandan
Ditutuik urang banda sawah
Busuangkan dado ang buyuang
Paliekkan tando laki laki
Jan takuik tanah katasirah
aso hilang duo tabilang
Sabalun aja bapantang mati
Namun dalam kabanaran
Walau dipancuang lihie putuih
Satapak pun jan namuahsuruik.